Алёнса сыходзіць з McLaren!

Фернанда Алёнса і McLaren усё-такі скасавалі кантракт.

Падпісаўшы трохгадовы кантракт і далучыўшыся да ангельскай каманды ў гэтым сезоне, Алёнса спадзяваўся на статус першага пілота каманды, але фантастычны дэбют маладога Люіса Гамільтана задзеў амбіцыі двухразовага чэмпіёна. Адносіны Фернанда і боса McLaren Рона Дэніса, які прадвігаў Гамільтана, значна пагоршыліся, і апагеем крызісу стала разьбіральніцтва па справе ‘шпіёнскага скандала’, калі Алёнса практычна здаў McLaren. Сезон Фернанда Алёнса скончыў на трэцяй пазыцыі, саступіўшы сваіму напарніку па камандзе.

Кантракт быў датэрмінова ануляваны, прычым гішпанцу не трэба будзе выплочваць McLaren адпускныя. Эпапея скончылася…

Па чутках, Алёнса мае некалькі варыянтаў для працягу кар’еры, сярод якіх Renault, Williams, Red Bull і Toyota. Але хутчэй за ўсё выбар будзе на карысьць Renault, дзе Фернанда заваяваў два чэмпіёнскія тытулы ў 2005 і 2006 гадах, толькі гэта каманда зможа пабудаваць для гішпанца хуткі балід.

А хто зойме вакантнае месца ў McLaren? Тут усё неадназначна. Гэта могуць быць: Ральф Шумахер, Пэдра дэ ля Роса, Хэйкі Кавалайнен, Ніко Росберг…

2.11.2007   ▪ Alonso, McLaren   ▪ lodar