Гран Пры Бахрэйна. Маса затыкае рот сваім крытыкам

Трэці этап Формулы 1, што прайшоў у Бахрэйне, пацьвердзіў дамінуючыя пазіцыі Ferrari.

Амаль увесь ўік-энд прайшоў пад сьцягамі італьянскай каманды. Толькі ў суботу па выніках кваліфікацыі поўл нечакана дастаўся паляку Роберту Кубіцы. Пілот BMW выдатна праехаў хуткае кола па трасе Сахіра і апярэдзіў сваіх больш тытулаваных супернікаў. Поўл для паляка і для BMW аказаўся першым у кар’еры і стаў добрай заяўкай на хуткую першую перамогу ў гонцы. Але цуда не здарылася. Паляк фінішаваў трэцім, але і гэты вынік — перамога для яго і яго каманды.

Феліпэ Маса, на якога пасьля двух правальна праведзеных Гран Пры лілося шмат крытыкі, са старта абыйшоў Роберта Кубіцу і упэўнена даехаў да фінішу на першай пазіцыі. Добры адказ крытыкам ад бразільца!

Мінулагодні чэмпіён Кімі Райканен, не блістаўшы хуткасьцю ў кваліфікацыі, стартаў толькі чацьвертым, але ўжо на другім коле абагнаў Кубіцу, замацаваўшыся на другой пазіцыі.

На фоне дублю Ferrari, вельмі невыразным бачыцца выступленьне McLaren. Надзея Брытаніі, Люіс Гамільтан, праспаў старт і адкаціўся ўглыб пэлетона. У спробах адыграцца, Люіс зламаў пярэднее антыкрыло аб балід Фернанда Алёнса. Пасьля гэтага гонка была правалена канчаткова — 13 фінішная пазіцыя ў Гамільтана. Другі пілот McLaren Хэйкі Кавалайнен таксама не ўразіў — пятае месца за фінам.

Па выніках Гран Пры Бахрэйна, у заліку пілотаў новы лідэр — Кімі Райканен. А ў Кубку канструктараў адразу тры каманды ў з мінімальнай розьніцаў у пойнтах: BMW, Ferrari і McLaren.

Наступны этап пройдзе 25-27 красавіка ў Гішпаніі. Хаця баліды Формулы 1 на трасе можна будзе ўбачыць ужо 14-16 красавіка, калі адбудуцца запланаваныя масавыя тэсты.

6.4.2008   ▪ Massa   ▪ lodar