Ferrari застаецца ў F1, BMW сыходзіць

Макс Мослі і супольнасьць каманд F1 (FOTA) нарэшце дамовіліся.

Нагадаем, што ў 2010 годзе FIA плянавала ўвесьці дабраахвотнае абмежаваньне бюджэтаў малых камандаў да £40 000 000. За гэта дазвалялася будаваць балід з больш прывабнымі характарыстыкамі, што па меркаванні экспертаў дало б вялікую перавагу на трэке. Гэта ідэя не спадабалася буйным заводзкім камандам, якія прызвычаіліся траціць каля паловы мільярду фунтаў на сэзон. Асабліва Ferrari і Toyota былі настолькі не задаволеныя новым рэглямантам, што заявілі аб сыходзе з F1 у 2010. Да іх далучыліся амаль усе дзейсныя каманды Формулы 1.

Як паведамляе Daily Mail, пасьля доўгіх перамоваў FOTA і FIA кансэнсус відаць быў знойдзены. Макс Мослі пайшоў на саступкі: падвойнага рэгляманту для бюджэтнікаў і вялікіх каманд не будзе, разам з тым ліміт бюджэту павялічыўся да £85 000 000, а заводзкія каманды зараз змогуць прадаваць свае шасі новым удзельнікам вялікага цырку.

Мяркуецца, што незадаволенымі засталіся толькі ў камандзе Toyota. Японцы пры вялізных укладаньнях так і не дабіліся посьпехаў у F1 і верагодна пакінуць чэмпіянат ўсьлед за Honda.

FIA аб’явіць усіх удзельнікаў сэзону F1 2010 ужо 12 чэрвеня.

P.S. Аб сваім сыходзе з гонак Ф1 нечакана аб’явіла каманда BMW. А Таёта шчыра клянецца, што прыме ўдзел у 2010 годзе.

29.5.2009   ▪ Ferrari, FIA, FOTA, Mosley, Toyota   ▪ lodar